Moleben van Danksegging

Die sg. Moleben van Danksegging is nou beskikbaar onder die rubriek Paraklisis en Moleben-dienste. Dit word veral in die Russiese kerkpraktyk gesing om dankbaarheid teenoor God vir uitkoms in nood uit te druk, en is natuurlik van besondere belang vir die Ortodoks-Christelike gelowige, daar die versuim om dank vir uitkoms te betoon selfs die Here Jesus se verwytende navraag ontlok het.

Die Groot Paraklisis

Tydens die Vastyd tussen die 1ste en 15de Augustus word die Groot en Klein Paraklisis om die beurt gesing. Daarom word die Groot Paraklisis nou, naas die Klein Paraklisis, beskikbaar gestel. Die vertaling is nie noodwendig geskik om op die sg. Bisantynse wysies gesing te word nie, maar sal wel op die gangbare Russiese wysies gedoen kan word. Die hoop is om mettertyd ‘n tweede weergawe beskikbaar te stel wat wel op die Bisantynse wysies gesing kan word. Dit sal waarskynlik daartoe lei dat die natuurlike vloei van die Afrikaans verwring sal word om by die wysies te pas. En begrippe sal omskryf moet word en selfs toevoeginge ondergaan, om dieselfde rede.

Die Boetekanon van die Heilige Andreas van Kreta

Die Boetekanon-dienste van die Heilige Andreas van Kreta wat vanaf Maandag tot Donderdag in die Eerste Week van die Vastyd gedoen word, asook tydens Vyfde Week op Donderdagaand, word tans vertaal en sal met verloop van tyd te vinde wees by die bladsy genaamd Triodion 2. Die diens word gedurende die Eerste Week telkens binne-in die Groot Kompletediens ingevoeg (sien Kompletedienste), maar tydens die Vyfde Week op Donderdagaand word dit by die Mettediens ingevoeg.

Pasga se Week van Vernuwing, oftewel Helderweek

Die dienste van die sewe dae van die Week van Pasga, ook genoem die Week van Vernuwing, of Helderweek, is nou almal beskikbaar onder die titel Pasga, met Vesperdienste, Mettedienste en Liturgiedienste. Dis besonder mooi dienste, daar dit grootliks die Pasga-diens herhaal, met toevoeginge daagliks uit die Oktoig, volgens die 8 Tone. Hoe meer ons hierdie dienste vier, hoe beter!

Die Mettediens

Die Mettediens vir Sondae en Feesdae is nou bygevoeg by die bladsy wat Vesperdienste bevat, wat nou gewysig is om Vesperdienste en Mettedienste te heet. Die ander vorme van Mettedienste sal hopelik mettertyd bygevoeg word. Die betrokke weergawe gee ‘n beeld van die gebruik in plaaslike gemeentes. Die Kanon word gewoonlik nie volledig gesing nie, met dalk hoogstens die Eerste en Derde Odes, indien enigsins. Boonop is die vertaling van die meeste Kanons nog nie gedoen nie. Soms word die Kanon wel volledig gesing, bv. by ‘n Fees van die Heer of Theotokos, indien beskikbaar.

Die Evangelielesing is by die korrekte posisie geplaas, net na die Prokimenon, hoewel daar gemeentes is waar dit eers na die 8ste Katawasia gelees word.

Menaion-tekste gekorrigeer

Die tekste van die Menaion, oftewel die veranderlike vir elke dag van elke maand van die jaar, is nou hersien en gestandaardiseer, en sover moontlik gekorrigeer (al die baie spelfoute!). Daar is wel dele wat nog nie vertaal is nie, bv. die Kanons van die meeste Mettedienste, hoewel sommige Kanons volledig of gedeeeltelik vertaal is. Die opeenvolgende dae is gewoonlik in groepe van 10 dae byeengebring en saamgevoeg, maar soms in groepe van 5 dae. Soms word volledige dienste se tekste gegee, veral vir die Groot Feeste van ‘n bepaalde maand, maar meestal net die veranderlike dele.

Die Griekse melodie-aanwysings word in hakies býgevoeg, ingeval die leser / sanger wil probeer om die teks op die bepaalde wysie te sing, iets wat soms moontlik mag wees, en soms nie. Die vertalings is eintlik bedoel om op die eenvoudige Russiese wysies gesing te word, wat nie so van sillabe-getalle en klemtone afhanklik is nie.

Paasdienste gekorrigeer en uitgebrei

Die Dienste van die Heilige Week en Pasga/Paasfees is nou hersien en gekorrigeer, en selfs uitgebrei, bv. die Vesperdienste van Liefde tydens Helderweek is nou volledig beskikbaar. Hierdie Vesperdienste is besonder vreugdevolle dienste, en is elke aand in ‘n ander musiektoon. Waar Griekse melodieie-aanduiding tydens Heilige Week-dienste langs die Toon-aanduiding aangebring is, beteken dit nie noodwendig dat die vertaling gemaklik op daardie wysies gesing kan word nie, hoewel dit wel soms so kan wees, met die nodige frasering en aanpassing.

Die Psalmboek uit die Septuagint vertaal

‘n Vertaling van die Psalms uit die Griekse vertaling van die Septuagint word nou beskibaar gestel. Die Kerklike teks is deurgaans gebruik (die tekstradisie het verskeie wissellesings). Die Griekse vertaling van die Psalms is gewoonlik, indien nie altyd nie, deur die skrywers van die Nuwe Testament gebruik wanneer hulle uit die Psalmboek wou aanhaal, en dit het die Psalmboek van die Kerk geword. Dit verskil nogal soms heelwat van die Hebreeuse tekstradisie wat in die Afrikaanse vertalings neerslag gevind het. Plek-plek is die betekenis van sekere verse heel onduidelik en uiters raaiselagtig, maar die oorgrote meerderheid Psalms is heel toeganklik. Die vertaling is ‘n voorlopige poging en hopelik kan dit nog verbeter word.

Kanon van Bekering

Onder Kanon-gebede is daar nou twee Kanons, een algemene kanon van Bekering, en een vir presbiters bedoel voor die viering van die Goddelike Liturgie.  Indien die leser nie met die wysies van die betrokke Irmos Toon bekend is nie, kan dit desnoods bloot gelees word. In ieder geval sal net die Irmosse gesing word, en die ander troparia gelees word.

‘n Hele maand se Menaion

Uiteindelik is ‘n hele maand, t.w. Maartmaand, se Menaion, met uitsondering van die Kanons, vir gebruik vertaal, en op hierdie webwerf geplaas. So nou kan Vesper- en Mettedienste, asook die Liturgiedienste vir Maartmaand almal gedoen word, met in agneming van die uitsluiting van die Kanons. Uiteraard sal die veranderinge wat die Vastyddienste meebring wel komplikasies by sommige van die daaglikse dienste meebring.